Luisteren kan via: https://l1.nl/dyanne-sleijpen-in-t-leste-waord-140269/

#girlboss #powervrouw #bossbitch hashtags die momenteel vaol weure gebroek op instagram.
’t sprook mich aan. De vrouwen die allemaol zo krachtig, modieus & veural succesvol euver kome en “gewone” luij zoaes os tips en trucks veur ’n avontuurlijker, succesvoller en fantastisch leve geve.  En dan nog neet euver hun instagram account gesproke. Gepolijste, fantastisch mooie foto’s gemaakt mit hunne gsm (Ahum) . Hael effe dach ich.. wauw! Die hubbe ’t veur elkaar.

Ich keek 2 weke geleije ‘nne vlog van un youtubester: dat is eemes dae filmpkes maak euver huer eige leve. Nao dae inne keek ich der nog ’n paar van andere vlogsters. En ’t veel mich op dat ich mich daonao niks mae weerd veulde. Die hubbe ’t veur elkaar! Wat sjtil ich eigenlijk veur? Die zin toch vaol beter? Zaoget zou mich nooit lukke. Woare gedachtes die in miene kop rondsjpookte. Noa ’n nach sjlaope waor dat geveul gezakt en ging ich opzeuk nao de oorzaak van mien geveul. Ich wou waal ‘ns weite wie die luij zich zo fantastisch succesvol kinne euverkome.

Mien google zoekopdrachten: Hoe maak ik een succesvolle vlog #powervrouw. Hoe maak ik een succesvolle instagram. En binnen no-time weur ich euverlade mit 1000de tips: welke technieke ich zou motte gebroeke veur prachtige foto’s mit miene gsm, of nog beter, huur ‘nne fotograaf veur al dien foto’s! Is de foto neet perfect, plaats ‘m dan neet weur streng gezag! Dat mien foto’s allemaol dezelfde kleur motte hubbe of ’t zelfde thema. Toen dach ich: Es ich noe scroll door miene telefoon, dao zit gin inkel foto tusje mit precies dezelfde kleur. Mer dao houwe ze direct de oplossing veur: FILTERS!

Dan ’n belangrijk onderwerp: apps um dien foto’s te bewirke: Rimpeltjes corrigeren, huidje oppoetsen, vitrulkes d’raaf knippe etc. mit de opmerking: wae wilt noe neet de biste kant van zichzelf laote zeen? Uhhh… biste kant Ja, nog zo ‘nne tip. De mos zurgde datste mit dien biste kant op de foto sjteis. Toen sjoot ich in de lach, want dao hub ich ech nooit op gelit. En nao enkele vroage die vriendinnen wiste die ’t auch neet. Fjieuw.. dat sjealde wir.

Dan de litste en belangrijkste tip: Wilste get veursjtille? Dan moste dien volgers kaupe! De begins pas mit te tille este meer dan 5000 volgers hubs. Meingod..

Toen bekeek ich mien eige Instagram profiel en veel mich get op: jan/feb/maart is veur mich de rustigste periode qua zang en presentatie. Dus ich dach, dan post ich get foto’s van de CD. En ich zoog: allein mer foto’s gemaakt door ‘nne fotograaf. (dae dat trouwens geweldig deit! ) Doon ich dan toch onbewust aan deze #powervrouw hype mit? Aj! Nae, dat wil ich neet.  Dan lever puur, euverbelicht & mit miene sjlechtste kant veurop.


About the author
Geef een reactie

Je email adres wordt niet gepubliceerd. Required fields are marked *

Verwijder formulierToevoegen